Peñagarikano eta Mendizabal pilotari profesionalek pilotan jokatzeko 'Babesku' izeneko eskularrua asmatu dute, ohiko takoen ordezko.
Eskuetako mina izaten da pilotarien gaitzik ohikoena. Bati pilota sartu egin zaiola, besteari kailua eten zaiola; edota pilotari behar bezala ez jo, eta hatzen bat hautsi duenik ere bada. Hanturak ere, hamabostean behin. Gero, noski, medikuetara jo behar. Masajisten laztanak hartu, gau eta egun eskuak gel eta kremekin igurtzi, eta nola edo hala osatutakoan, kantxara berriz.
Kepa Peñagarikano eta Aratz Mendizabal pilotari profesionalek badakite eskuetako minekin egotea zer den. Gainerako pilotari guztiek bezalaxe, takoak eta esparatrapua erabiltzen dituzte eskuak babesteko, baina hala ere, askotan, ez dira nahikoa eskuetako mina saihesteko. «Masajistak esaten zigun nola zen posible, gaur egun dagoen teknologiarekin, eskuetarako ezer ez edukitzea, ea ezin zitekeen eskularruren bat egin», azaldu du Peñagarikanok. Ideia gustatu zitzaien bi pilotariei, eta eskularru hori egin egingo zutela erabaki zuten. Urte eta erdiren buruan, esku artean dute 'Babesku' izeneko eskularrua.
Hasieran podologo batekin jarri ziren harremanetan, oinetako barne zolak egiteko material asko erabiltzen dituztelako. «Azkenean, behintzat, nahi genuen silikona aurkitu genuen», adierazi du Peñagarikanok. Hurrengo urratsa, silikona hori eskularruan itsasteko modua bilatzea zen. Bueltan-bueltan, Bartzelonako enpresa batek eskularrua egingo ziela agindu zien. «Zortzi bederatzi eskularru egin behar izan dituzte gure gustukoa lortu arte».
PROFESIONALENTZAT EZ. Kolore eta neurri ezberdineko eskularruak dira, hamabi urtetik gorakoentzat hasiera batean. Silikonazko babesgarriak dituzte hatzetan eta esku-ahurraren goiko partean. Alde hori larru sintetikoz egina dago, eta bestea sarezkoa da, izerdia kanporatu ahal izateko. Mendizabalen esanetan, pilota eskoletan ari diren haurrentzat eta txapelketa herrikoietan parte hartzen duten zaletuentzat dago pentsatuta eskularrua. «Profesionaletako pilotekin jokatzeko, silikona geruza bikoitza beharko genuke» zehaztu du.
Gipuzkoako eta Bizkaiko Foru Aldundiek, eta Gipuzkoa Pilota Federazioek «begi onez» ikusi dute asmakizun berria, eta diruz ere lagundu diete. Gipuzkoako Federazioak, esate baterako, 300 eskularru hartu ditu kluben artean banatzeko, eta Bizkaia aldean beraiek ari dira eskularruaren sustapena egiten.
Pilota munduko «zenbait klasikok» asmakizun berriak ez duela ezertarako balio esan arren, bi pilotariek ez dituzte haien esanak aintzat hartu. «Pilotan ere berrikuntza behar da. Eskularrua erosoa da, eta material onekoa. Horrek balio du!».
